Ѕвездите од СП назад за мечот во Ирска

Фановите на Јунајтед, посебно оние во Ирска ќе имаат можност да ја видат четворката играчи на клубот која настапи на СП повторно во акција.

Вејн Руни, Мајкл Керик, Жи-Сунг Парк и Немања Видиќ плус Антонио Валенсија кој е на пат кон целосно заздравување по операцијата на зглобот, ќе бидат во тимот кој во вторник ќе настапат против најдобрите играчи од Ирската Премиер Лига.

Сите 5 играчи ја пропуштија турнејата низ Северна Америка и токму тековниот меч ќе биде круцијален во нивната подготовка за стартот за новата сезона.

Pre-season: UNITED vs. Kansas City 1-2

Денес наутро се одигра и третиот меч од пред-сезоната на Јунајтед каде на мечот против екипата на Канзас Сити Визардс тимот го забележа првиот пораз на турнејата низ САД.


Тимот настапи во следниот состав:

Amos

Rafael Smalling Evans De Laet

Nani Scholes Gibson Giggs

Berbatov Diouf

Голман. Како што се очекуваше младиот Амос ја доби шансата на овој меч да застане помеѓу стаивите со надеж дека ќе покаже дел од својот талент и ќе ја оправда довербата од Ферги. Од тоа што го видов вчера Бен не ми остави некаков впечаток, често излетуваше на нафрлени топки, малку несигурен во интервенциите, рака на среце имаше неколку добри одбрани, но мислам дека сеуште е далеку и од борбата за втор голман со Кушчак. Времето работи за него, се надевам добро ќе го искористи.

Одбрана. Во одбраната ги видовме младите надежи и иднината на клубот во овој дел од тимот. Можам да кажам дека ниту овој дел од тимот не ме импресионираше. Рафаел одигра лошо прво полувреме, играчот на Канзас, Милер многу лесно поминуваше покрај него. Смолинг делуваше сигурен со мали грешки, се на се немаше лоѓ натпревар. Еванс стандардно добар, Де Лает имаше лошо прво и нешто подобро второ полувреме со само неколку добри пробиви по левата страна. Исто така ги видовме и Фабио кој одигра добра втора половина од вторите 45 минути.

Среден ред. Настапивме со силен среден ред, среден ред со кој понекогаш дури игравме и на мечевите од Премиер Лига. нани по повредата за прв пат настапи, немаше кјознае каков меч, но сепак ова му е прв настап, треба да влезе во форма, имаше неколку добри потези, се надевам ќе го видиме во подобро светло во следните мечеви. Сколс и посебно Гибсон имаа лоши мечеви, иако Сколси малку го поправи впечатокот, Гибсон не успеа и заслужено беше заменет во второто полувреме. Гигс исто така не одигра на ниво, помалку нервозен. Во второто полувреме влегоа Обертан и Клеверли кои според мене го поправија малку впечатокот, но недоволно за барем да се постигне израмнувачки гол.

Напад. Се надевав дека Берба и Диуф ќе се поврзат повоторно како на натпреварот со Селтик. Не беше така, напротив Диуф буквално се изгуби на теренот, не добиваше топки, лошо се движеше, можеби прв кандидат за замена во тимот. Бербатоов исто така не беше на ниво, постигна гол, но сепак се очекуваше да биде лидер на овој тим и да ја преземе одговорноста во свои раце. Во второто полувреме влегоа Македа и Велбек кој ја раздвижија играта и имаа неколку убави шанси, но за жал не постигнаа гол.

Единствениот гол за Јунајтед го постигна Бербатов од пенал.

Мора да се напомене и ужасното судење на арбитарот, тотално се изгуби на теренот, ужасни одлуки, даваше црвени и жолти картони за стартови кои воопшто не беа фаули и очигледни стартови кои воопшто не ги санкционираше, остави црна дамка на мечот.

Мило ми е што ваквите лоши игри се случуваат токму во овој дел од сезоната, грешки од кои се учи и кои не носат поголеми последици. Отрезнувачки пораз кој дојде во одлично време пред мечот со MLS All Stars. Се надеваме дека играчите ја научија лекцијата (и го слушнаа hairdryer-от на Ферги) и дека на следниот меч ќе го видиме вистинскиот Јунајтед.

Хајлајтс од натпреварот на следниот линк.

ВДС: Не брзам со пензионирањето

Голманот на Манчестер Јунајтед, Едвин ван дер Сар вели дека не брза со пензионирањето, иако во октомври ќе го прослави 40-от роденден.



ВДС пристигна во Јунајтед од Фулам во 2005 година и оттогаш е незаменлив број еден на голот. Во фебруари потпиша нов едногодишен договор и ќе остане на голот на Јунајтед до крајот на оваа сезона. Но, вели дека не брза со пензионирањето.

„Последниве 3-4 години ова прашање го слушам често. Понекогаш човекот сам себеси се изненадува. Ова е одличен клуб и чест е да се биде во него. Играш во ПЛ, ЛШ и други купови против најдобрите фудбалери во светот. Ова е нешто премногу добро за да се прекине да се прави. Иако имам скоро 40 години, не ми пречи да вложувам напори да настапам во сабота попладне и потоа во вторник навечер во стартните 11. Можам да направам уште многу работи за клубов. “, изјави Едвин.

Фергусон: Повредените играчи напредуваат

Додека екипата е на подготовки во САД, играчите кои не отпатуваа засилено се подготвуваат во базата Керингтон.

Гери Невил и Антонио Валенсија започнаа со тренинзи, додека Мајкл Овен и Рио Фердинанд полека заздравуваат од повредите.

''Гери започна со тренинзи, додека истото треба да го направи и Валенсија во понеделник. Мајкл Овен заврши огромна работа до сега, малку е поназад во заздравувањето од Гери и Антонио и не сум сигурен дали ќе биде подготвен за стартот на сезоната. Рио најверојатно е 6 недели далеку од враќање на теренот.''

Ферги исто така се осврна и на повредите на Андерсон и Харгривс изјавувајќи: ''Андерсон ќе биде подготвен кон крајот на септември како што однапред предвидовме, додека пак Овен Харгривс ќе остане во САД се до оној момент кога ќе биде подготвен да се врати'' - заврши Фергусон.

Се формираше Клубот на навивачи МАНЧЕСТЕР ЈУНАЈТЕД Македонија

Чест и големо задоволство ми е да објавам дека Клубот на навивачи МАНЧЕСТЕР ЈУНАЈТЕД Македонија е официјално формиран и признаен од нашите институции и од денес почнува со своите активности.

Конечно идејата на една група на фанови на најголемиот клуб на светот стана реалност и доби една повисока форма на организирање на армијата фанови кои ги има во нашата земја. Во план се многу активности за кои секако навремено и точно ќе бидат известени сите идни членови во Клубот на навивачи.

Зачленувањето започнува во понеделник кога повторно ќе бидете известени како може да го сторите тоа. Доколку имате другар или друг близок пријател, роднина или пријател, информирајте го како со ваша помош би станале водечки фан клуб на некој од европските клубови во Република Македонија. Како доказ дека навистина Клубот на навивачи е формиран, одете на следниов линк и напишете манчестер (на кирилица) и стиснете провери.

Првиот и можеби најтежок чекор е веќе направен, исто така контактираме и со повеќе официјални supporters clubs
низ Европа и од некои веќе имаме отворени понуди за соработка. Направен е контакт и со клубот, од каде чекаме потврда за условите кои ќе треба да ги исполниме пред да испратиме барање да бидеме признаени, иако ни се познати, но чекаме официјална потврда. Во најскоро време ќе има објавено и на блогот инфо кои целото време ќе стои таму каде се убаво ќе биде објаснето како за Здружението, така и за самото зачленување.

Можете да не контактирате на официјалниот маил - red_army_mkd@yahoo.com, Manchester United Supporters Club - MUSC Macedonia која е официјална Facebook група на Клубот на навивачи и преку блогот United Devils - Macedonia кој е официјален блог и место каде можете да ги следите сите новости за клубот.

Нов договор за Видиќ

Дејвид Гил потврди дека Манчестер Јунајтед му понуди нов договор на Немања Видиќ и неговиот агент како и самиот Видиќ го прифатиле.

„Имаше многу шпекулации во медиумите за Видиќ кои не дојдоа од страната на Јунајтед ниту па од страната на Видиќ. Седнавме двете страни и успешно ги договоривме дискусиите, па Видиќ го прифати договорот. Со тие преговори почнавме пред СП, додека траеше турнирот затаија, но откако заврши, еве дојдовме до заеднички јазик.“, изјави Гил.

Тој додаде: „Договорот официјално се` уште не е потпишан бидејќи Видиќ е на одмор, но ќе биде потпишан на почетокот на август.“

Се чека реализација на трансферот на Дефур

По се` изгледа, Манчестер Јунајтед ќе доведат уште едно засилување овој преоден рок. Белгиецот, младата ѕвезда Стивен Дефур е на радарот на Јунајтед и се шпекулира за сума од 13 милиони фунти.

Агентот на Дефур изјави дека неговиот клиент има доовор со неговиот клуб до 2013, но понуда од Јунајтед тешко кој ја одбива. „Сер Алекс во септември на Дефур му испрати писмо, кога тој се мачеше со повредата. Тој е се` уште заинтересиран но мораме да почекаме Стандард да ја прифати понудата.“

Агентот додаде: „Има интерес од клубови од Италија, Шпанија, Германија, но Стивен сака да игра во Јунајтед и во ПЛ. “

Манчестер Јунајтед - Највреден спортски бренд во светот

Манчестер Јунајтед е највредниот спортски бренд во светот според светски познатиот магазин Форбс, кој оваа анализа ја прави секоја година.

На листата од 50 највредни брендови Јунајтед се најде на првото место со проценета вредност на 1.84 милијарди американски долари. На второто место се најде тимот од американската НФЛ Далас Каубојс со проценета вредност од околу 1.09 милиони американски долари.

Во листата на фактори кои влијаат врз оценката за вредноста на спортските брендови, особено на вредноста на Јунајтед вијаеле продажбата на официјални реквизити на клубот, средствата добиени од спонзорства и ТВ права и сл.

Don't thank the Glazers for this.

Чичарито - 14

Новото засилување на Манчестер Јунајтед, младата мексиканска ѕвезда Хавиер Ернандез следната сезона во Јунајтед ќе настапува со бројот 14 на својот грб.

Ернандез на СП постигна два гола и беше утврден како најбрзиот играч на турнирот. Ќе му биде предаден бројот 14 и наместо неговото презиме, ќе биде испишан неговиот прекар - Чичарито.

Се надеваме дека Чичарито ќе блесне со бројот 14 на неговиот грб, нешто што не им успеа на Алан Смит и Зоран Тошиќ.

Pre-Season: UNITED vs. Philadelphia 1-0

Рано утрово Јунајтед го одигра својот втор меч од турнејата низ САД со тимот на Филаделфија Јунион на стадиониот на истоимената екипа.


Екипата настапи во следниот состав:

Kuszczak

O'Shea Evans Brown Fabio

Obertan Scholes Cleverley Giggs

Welbeck Macheda

Мечот веднаш започна со блага иницијатива на Јунајтед и иако изгледаше дека се работи за инфериорен противник сепак крајниот резултат говори дека можеби тимот на Филаделфија беше малку потценет.

Голман. Солиден меч на Кушчак, одбрани неколку поопасни топки, сигурен, стабилен на голот. Се на се добра партија на Томас.

Одбрана. Како и на првиот меч така и на овој одбраната се покажа во добро светло, успешно расчистувајќи ги сите посериозни опасности од пред голот на Кушчак. Еванс уште еднаш покажа дека созрева во играч кој можеби уште оваа сезона ќе се бори за местото во првите 11. Браун и О'Шеј искусно си ја завршија својата работа, Фабио исто така солиден. Во 2то полувреме во овој дел на тимот ги видовме и Де Лает, Смолинг, Рафаел и Кори Еванс кои продолжија со добрата игра што резултираше тимот да не прими гол, иако противникот имаше неколку посериозни шанси да постигне гол.

Среден ред. Овој дел од тимот беше микс на младост и искуство. Сколс продолжи со своите одлични игри, прекрасно додаваше, добра визија, ги разигруваше соиграчите. Клеверли покажа дека не беше тука така избран за играч на сезоната во Ватфорд каде беше позајмен, покажува константен напредок во неговата игра. Гигс на ниво како и секогаш без премногу грешки. Обертан имаше малку послабо прво полувреме, некогаш безглаво јуришајќи на голот. Талентот е тука, но тој успешно треба да се спои со менталната страна на играчот, Нани ја пронајде таа врска, се надеваме дека истото ќе се случи и со Обертан. Во овој дел од теренот ги видовме и Флечер кој одигра солидно како и секогаш.

Напад. Искрено се надевав дека Ферги ќе излезе токму со овие двајца играчи во овој дел од тимот. Велбек имаше добар натпревар, трчаше, се бореше и иако промаши неколку изгледни шанси сепак сметам дека тоа што го покажа ќе биде доволно за да добие уште минутажа на турнејата. Малку бев разочаран од Македа, имаше неколку добри додавања, но тоа е се што направи на овој меч. Сигурен сум дека во следните мечеви ќе ме демантира и ќе го потврди талентот кој несомнено го има. Го видовме и Бербатов кој веднаш ја раздвижи екипата и во текот на натпреварот имаше прексрасна шанса која заврши во пречката на голот на Филаделфија.

Голот падна во 75та минута по грешка на еден од играчите на противникот, кога топката дојде до Велбек, кој прекрасно втрча и уште поубаво додаде до Обертан кој без многу проблеми ја пласираше во левиот долен агол покрај противничкиот голаман.

Manchester United vs. Philadelphia Union 1-0 Стрелец: Обертан 75'

Pre-season: UNITED vs. Celtic 3-1

После летото исполнето со доста фудбал на репрезентативен план, дојде време за тимовите. Време е за пред-сезоната и подготовките за следната. По 2 и пол месеца без да го гледаме нашиот Јунајтед вчера на програмата беше првиот од 5-те дуели кој клубот ги игра во периодот до 8-ми Август.


Вчерашен противник беше Селтик, екипа со која дуелите се карактеризираат како The battle for Britain, иако можеби ова не беше случајот со оглед на профилот на мечот. Јунајтед на теренот истрча со следниот состав:

VDS

Rafael Smalling Evans Fabio

Obertan Fletcher Scholes Giggs

Berbatov Diouf

Сега накратко ќе дадам краток осврт на сите компоненти од тимот за натпреварот.

Голман. Нема што многу да се трошат зборови, ВДС како и обично на ниво, солидно си ја заврши работата.

Одбрана. Одбрамбените играчи кои го стартуваа мечот се најверојтно иднината на клубот. Близнаците покажаа дел од својот раскошен талент, не пропуштија ниту една топка и одлично го затворија просторот по крилните позиции на Селтик. Еванс стандардно добар. Истото важи и за играчите кои влегоа во второто полувреме, О'Шеј, Де Лает, Браун, иако последниот малку повеќе нервозен од потребното.

Највеќе внимание ќе издвојам за Смолинг, бидејќи ова му беше деби во нашиот дрес и можност сите ние поубаво да видиме за каков играч се работи. Искрено моите првични впечатоци за него се прилично добри. Висок, силен играч, добро игра со глава, сигурен со топката и делува самоуверено, наликува на помлада верзија од Рио. Пеналот кој го направи воопшто не му го замерувам, тоа се грешки кој секој млад играч ги прави, а подобро тие грешки да се случуваат во овој дел од подготовките отколку на мечевите во Премиер Лигата. Keep up the good work lad.

Среден ред. Овој дел од екипата исто ме задоволи со играта. Гигс и покрај годините сеуште добро се движи, прави финти и воопшто не се плаши да тргне очи во очи со противничката одбрана. Сколс како и обично, дели топки со очи, гине на теренот, има уште една добра сезона во него. Флечер се надеваме ќе продолжи со истото темпо како лани, добар прв меч и за него. Обертан покажа дел од одличната техника, брз како молња и ако оваа година созрее и со искуството кое би го добил може да стане играч на кој Ферги ќе треба сериозно да смета во иднина. Ми се допадна како изигра, имаше и грешки, ама сепак ова е прв натпревар во пред-сезоната.

Ги видовме и Клеверли, кој влезе некако премногу нервозно во мечот, но потоа се стабилизираше и постигна гол, Гибсон кој се прикажа во добро светло, посебно ми се допадна неговата визија и додавањата кој лани како малку да затаија од него.

Напад. Бербатов и Диуф како стартери во овој дел на екипата се покажаа одлично, како неколку години да играат заедно. Ако вака продолжи Диуф, Фергусон ќе се најде во вистинска дилема дали да го позајми или да го остави во тимот за следната сезона и почесто да добива шанса. Ги видовме и младите Македа и Велбек, вториот постигна и гол, го дадоа својот придонес во играта, fair play to them.

Бербатов. Man of the match без сомнение. Играше, шутираше, дриблаше, додаваше, асистираше, постигна гол. Како да сакаше да му докаже на Ферги и фановите дека оваа сезона ќе гледаме еден нов Бербатов, кој ќе даде повеќе голови, заедно со Руни ќе биде лидер во тимот и Бербатов кој трча. Браво за него, само така нека продолжи.

MANCHESTER UNITED - Celtic 3-1

Стрелци: Бербатов, Велбек, Клеверли (UTD), Самарас (п) (CEL)

Highlights од вчеарашниот меч на овој линк.

Фергусон: Одбив да бидам менаџер на Англија

Сер Алекс изјави дека работата да бидеш менаџер на Англија е одвратна и дека на неколку наврати ја има одбиено.


Пред почетокот на натпреварот против Селтик, Фергусон изјави дека во неколку наврати работата како селектор на Англија му била понудена, но ја одбил. „Тоа е многу лоша работа. Како прво, тука е хендикепот што сум Шкот и имам свои причини зошто не би ја водел оваа земја. Секако, си имам и свои планови со Манчестер Јунајтед, младите играчи кои ги гледате не се туку така донесени. Потоа, ПЛ е истоштувачка. На пример, во декември играме 8 или 9 натпревари, кога условите за игра се лоши, терените се никакви и времето е ужасно. “ изјави Сер Алекс.

Во врска со слабите перформанси на англиската селекција, тој додаде: „Потоа доаѓа и вториот дел од сезоната, кога играчите почнуваат да го чувствуваат заморот, но играат поради шансите за успех. Па на крајот, ги чека СП. Не може тоа така. Факторот наречен одмор е и повеќе од потребен за да се успее.“

Промовиран новиот дрес

Од денес, 15 јули, Манчестер Јунајтед ќе настапува во новите дресови од фирмата Nike, на кои за првпат во историјата на клубот ќе стои логото на новиот спонзор, Aon.


Домашниот дрес ќе биде налик на дресовите кои Јунајтед ги имаше во 80-тите, со јака и бели ленти на ракавите, а на поработ на ракавите ќе го има и амблемот со црвеното ѓаволче. Иако домашниот дрес наиде на воодушевување кај фановите на Јунајтед, тоа не беше случај со гостинскиот. Иако се` уште официјално не е промовиран, се шпекулира дека тоа ќе биде овој дрес:


Овој дрес можеби е досега еден од полошите кои Манчестер Јунајтед ги имал како избор за гостински дрес. Лошата комбинација на црвената и црната боја кај ракавите е клучна, па можеби креаторите на дресот можеле ако ништо друго да го остават гостинскиот дрес еднобоен - бел.

Третиот дрес, ќе биде гостинскиот црн со сино од минатата сезона, (секако, само спонзорот ќе биде променет) бидејќи третите дресови мораат да имаат нешто сино во чест на сините дресови кои фудбалерите на Јунајтед ги носеле во финалето во ЛШ, 1968 година, кога е освоена и првата ЛШ титула.

Фергусон: Не испратив понуда до Снајдер, не ми треба

Сер Алекс Фергусон ги негираше сите пишувања дека тој испратил понуди до Весли Снајдер и Месут Озил велејќи дека овој Јунјатед е посилен од оној минатата сезона.

Ферги особено реплицираше на изјавите за Снајдер каде според пишувањата на некои медиуми се шпекулираше дека клубот испратил понуда во висина од 30 милиони фунти за холанѓанецот и дека Снајдер ја одбил истата.

''Сметам дека тимот е посилен од оној минатата сезона и дека особено тоа се однесува на младите играчи кои имаат една година повеќе искуство во однос на минатата. Не знам од каде се појавија овие написи за Снајдер. Како некој може да ме одбие ако јас воопшто не сум испратил понуда до него?'' - запраша Фергусон.

Исто така менаџерот ги отфрли и шпекулациите кои го поврзуваа Јунајтед со евентуалниот потпис на Озил.

Ферги: Харгривс ја пропушта пред-сезоната

Денеска во изјава за MUTV Фергусон потврди дека Овен Харгривс ги пропушта сите натпревари од пред-сезоната.

''Лошата вест е што Харгривс е повторно во САД кај неговиот специјалист. Тој нема да биде подготвен за почетокот на сезоната. Ниту јас не знам кога повторно ќе биде фит.''

Инаку добри вести пристигнуваат за други 3-ца играчи на клубот кој треба да заздрават од повредите и да бидат подготвени за стартот на сезоната.

''Антонио Валенсија би требало да биде ОК, истото важи и за Нани. Мајкл Овен одлично напредува и напорно работи во вежбалната. Тој нема да биде фит за подготовките, но би требало да се врати за стартот на ПЛ.''- додаде Ферги.

Околу повредата на Фердинанд, менаџерот кажа дека сеуште не е најсигурен дали Рио ќе биде навремено оспособен за мечот со Њукасл на 16-ти август.

"Се зависи од напредокот кој тој ќе го има во следните неколку недели.''

За Андеросн, Фергусон верува дека тој би направил кам-бек кон крајот на септември.

Новиот дрес презентиран на 15ти јули, нарачки од денес

Новиот дрес на Манчестер Јунајтед ќе биде презентиран за две недели, но од денес ќе може да се направат нарачки од официјалната онлајн продавница на клубот.

Деталите од најновата креација на Најки се држат во тајност, но дресот може да се порача и ќе ви биде доставен на 15ти јули, на денот на промоцијата.

Овој дрес за прв пат ќе биде облечен на претсезонската турнеја против Селтик.